Rəhbərlik



     Direktor: İSMAYILZADƏ NAİDƏ MƏBUD qızı

     Bakı şəhərində anadan olub.
     O, 1981-ci ildə M.Əliyev adına Azərbaycan Dövlət İncəsənət İnstitutunun “Teatrşünaslıq” fakültəsini bitirmişdir. Əmək fəaliyyətinə 1981-ci ildə “Azərbaycanfilm” Kinostudiyasında başlayan N.İsmayılzadə 1984-1989-cu illərdə Azərbaycan Dövlət Filarmoniyasında böyük redaktor kimi işləmişdir.
     1989-2006-cı illərdə Azərbaycan Respublikasının Mədəniyyət Nazirliyində, 2006-2018-ci illərdə isə Azərbaycan Respublikasının Mədəniyyət və Turizm Nazirliyində çalışan N.İsmayılzadə burada işlədiyi müddətdə Nazirliyin İncəsənət İdarəsində baş inspektor, repertuar-redaktor kollegiyasının üzvü, baş mütəxəssis, Teatr sektorunun müdiri kimi vəzifələri icra etmişdir. N.İsmayılzadə 2018-ci il iyun ayının 1-dək Mədəniyyət Nazirliyinin İncəsənət şöbəsi Teatr sektorunun müdiri vəzifəsində çalışmışdır. O, dövlət qulluğunun kiçik müşaviridir. N.İsmayılzadə Azərbaycan Respublikası Prezidentinin Fərman və Sərəncamlarına əsasən respublikada keçirilən bir çox irimiqyaslı dövlət səviyyəli tədbirlərin, Bakı Beynəlxalq Teatr Konfransının, Cırtdan Beynəlxalq Kukla Teatrları Festivalının, Şəki Beynəlxalq Teatr Festivalının təşkilatçılarından, “Teatr və Teatr fəaliyyəti haqqında” Qanunun, “Azərbaycan Teatrı 2009-2019-cu illərdə” Dövlət Proqramının müəlliflərindən biridir. “Yaddan çıxmaz Qarabağ”, “Deyilən söz yadigardır”, “Bakıda teatr görüşləri” layihələrinin rəhbəridir.
     N.İsmayılzadə bədii tərcümə ilə də məşğul olur. Onun türk dilindən tərcümə etdiyi T.Cücenoğlunun “Qadıncıqlar”, T.Özakmanın “Ocaq”, S.Şendilin “Yeddi ərli Hürmüz”, rus dilindən tərcümə etdiyi E.Filipponun “Vinçenso de Pretori”, A.Ekzüperinin “Balaca şahzadə”, B.Şounun “Piqmalion”, A.Saqarelinin “Xanuma” əsərləri Azərbaycan Dövlət Akademik Milli Dram Teatrında, Azərbaycan Dövlət Musiqili Teatrında, Azərbaycan Dövlət Rus Dram Teatrında, Azərbaycan Dövlət Kukla Teatrında, Gəncə Dövlət Dram Teatrında, İrəvan Dövlət Azərbaycan Dram Teatrında tamaşaya qoyulmuşdur.
     Azərbaycan Teatr Xadimləri İttifaqının üzvüdür.
     Azərbaycan Respublikasının Prezidentinin Sərəncamına əsasən N.İsmayılzadə 2009-cu ildə “Dövlət qulluğunda fərqlənməyə görə” medalı ilə təltif olunmuşdur.




     Direktor müavini: İBRAHİMOVA GÜLNARƏ İDRİS qızı

     Bakı şəhərində anadan olub.
     1966-cı ildə Bakı şəhəri 102 saylı orta məktəbə, 1975-ci ildə isə Orta İxtisas Musiqi Texnikumunun fortepiano ixtisası üzrə qəbul olmuşdur. 1983-cü ildə M.Əliyev adına Azərbaycan Dövlət İncəsənət İnstitutuna daxil olmuş, 1988-ci ildə təhsilini klub işinin təşkilatçı metodisti ixtisası üzrə bitirmişdir. 1979-cu ildən 1981-ci ilədək Uşaq musiqi məktəbində fortepiano müəllimi, 1982-ci ildən 1983-cü ilədək Xarici Dillər İnstitutunda musiqi müəllimi, 1985-ci ildən 1990-cı ilədək Mədəniyyət Nazirliyinin Musiqi Təhsili üzrə Tədris Metodika Kabinetində laborant, metodist, 1990-cı ildən 2006-cı ilədək Mədəniyyət Nazirliyinin Kadrlar və mütəxəssislərin hazırlanması şöbəsində I dərəcəli inspektor, aparıcı mütəxəssis, böyük məsləhətçi, 2006-cı ildən 2014-cü ilədək Mədəniyyət və Turizm Nazirliyinin Kadrlar şöbəsinin böyük məsləhətçisi, 2014-cü ildən 2018-ci ilədək Mədəniyyət və Turizm Nazirliyinin İnsan resursları şöbəsinin böyük məsləhətçisi vəzifəsində çalışmışdır.
     2018-ci ilin iyun ayından Azərbaycan Dövlət Gənc Tamaşaçılar Teatrına direktor müavini təyin edilmişdir.
     Ailəlidir, iki övladı var.


Copyrights © , Azərbaycan Dövlət Gənc Tamaşaçılar Teatrı     |     Saytın hazırlanması: Proqres IPX